Palaoa
Ua makemake ʻo William T. Bringham, ka luna hoʻolaukaʻi mua o ka Hale Hōʻikeʻike ʻo Bīhopa i kekahi ʻano mea nui no ka Hale Hawaiʻi me kekahi mea hoʻi e hoʻohanohano ana i nā kānaka ʻō koholā o ke kenekulia ʻumikumamāiwa haneli, na lākou hoʻi i hoʻowaiwai iki mai iā Hawaiʻi nei. Ua noi akula ua Bringham nei i ka Wardʻs Natural Science Establishment "e loaʻa iā lākou kekahi kino iwi maikaʻi helu ʻekahi no ia mea he palaoa." He palaoa kāne kino maikaʻi kēia mea hōʻikeʻike palaoa a ma mua, ua manaʻo ʻia, ʻo ia ka mea hōʻikeʻike palaoa maikaʻi lua ʻole ma ʻAmelika Hui Pū ʻIa. No Bringham ia manaʻo, ʻo ka waiho ahuwale ʻia o kekahi hapa o ke kino o ka palaoa me ka ʻike ʻana i ka iwi, ma muli hoʻi o kāna ʻike maka ʻana akula i kekahi ʻano mea hōʻikeʻike like ma ka Natural History Museum ma Lādana.
Ua hana ʻia nei kino iwi i piha ʻehā kaukani ʻekolu haneli paona ma Nū Ioka ma mua o kona halihali ʻia ʻana ma luna o ke kaʻaahi a me ka moku holo moana a i Honolulu nei. ʻEkolu kaukani paona o ka iwi poʻo nunui a ʻelua paona ke kaumaha o kēlā me kēia niho. ʻAʻole ʻike mōākāka ʻia ka hoʻomaʻemaʻe ʻia ʻana o ka iwi kino o ka palaoa. ʻO ka hana maʻamau o ia wā, ʻo ia hoʻi ka helehele ʻana i ka hapa nui o ka ʻiʻo i ka moana, a paila aku i ka iwi, a laila e ʻoma ʻia. Hoʻokahi wale nō ʻōlelo ʻana pili no i ka hoʻomākaukau ʻana i ka iwi kino o ka palaoa, ʻo ia hoʻi "ka mālama ʻana aku i ka wela o ka iwi poʻo ma waena o ka hoʻokahi haneli kanalima kēkelē me hoʻokahi haneli kanawalu kēkelē no ʻekolu mahina," no ka hoʻokaʻawale ʻana i ka ʻaila.
Ua hoʻokomokomo ʻia ka iwi kino o ka palaoa holoʻokoʻa ma ka pā hale ma waho aʻe o ka hale hana o Ward i hiki ke hana ʻia ka mea hokahokai no ka ʻili o ka palaoa. A pau ia hana ʻana, ua māhelehele ʻia no ka halihali ʻana. Ua hoʻomāhelehele ʻia ka ʻili mea hokahokai i ʻumikumamāhiku ʻāpana.