Ki‘i hulu manu
Ki‘i hulu manu ‘o Kūkā‘ilimoku (Kū, ke kā‘ili o nā mokupuni)
‘O nā hulu o ka ‘i‘iwi a me ka ‘ō‘ō; ka ‘aha olonā me ke aho ‘a‘a ‘ie‘ie, me nā ‘ōnohi maka i hana ‘ia me ka iwi o ka pāua i ho‘opa‘a ‘ia me nā kui lā‘au ‘ele‘ele, i hana ‘ia ka waha me nā niho ‘īlio he kanaiwakumamāhā.
Ua kū‘ai ‘ia mai ka American Board of Commissioners for Foreign Missions, makahiki ‘umikumamāwalu kanaiwakumamālima
‘O ke ki‘i hulu manu, ‘o ia nō nā ki‘i i ‘oi a‘e kona kapu ma mua o nā ki‘i akua ‘ē a‘e. Ho‘ohana ‘ia kēia mau ki‘i hulu manu i mau mea e hea aku ai i kekahi mau akua me nā pule a me nā mōhai kūpono. Ua ili ia mau ki‘i hulu manu ma luna o nā ali‘i nui, a i kekahi manawa, ua ho‘ola‘a hou ‘ia ia mau ki‘i me ka haipule ‘ana aku me ka ‘aha kauila huluhulu, ‘o ka ‘aha ho‘i ia e ho‘okāhiko hou ‘ia ai nā ki‘i me nā hulu manu a me ka hana pono ‘ana i nā pule.
Ua ho‘oili ‘ia ‘o Kūkā‘ilimoku, ke akua o ke kaua ‘ana a me ka hana kālai’āina , ma luna o Kamehameha ‘Ekahi e kona ‘anakala ‘o Kalani‘ōpu‘u, ke ali‘i nui o Hawai‘i mokupuni. Ua mālama akula ‘o Kamehameha a me kona mau kāhuna i nā ‘aha haipule me nā mōhai a me ke kūkulu ‘ana i heiau e ho‘ola‘a ‘ia no Kūkā‘ilimoku. Me ka mana piha o Kūkā‘ilimoku i hiki ai iā Kamehameha ke na‘i aku i nā mokupuni o Hawai‘i. Me ka ho‘olālā pono ho‘i i ho‘okumu ai ‘o Kamehameha i ke Aupuni Hawai‘i.
Ma waena nō o nā ki‘i hulu manu ‘umikumamāiwa e loa‘a nei ma nā hale hō‘ike‘ike like ‘ole a puni ke ao, aia ‘elua i ka Hale Hō‘ike‘ike ‘o Bīhopa e mālama pono ‘ia nei.