Nā Wao: Nā Wao o ka Hale Hawai'i
Ua hemo hou 'ia ka Hale Hawai'i ma hope o ka ho'oponopono hou 'ia 'ana i ʻoi aʻe hoʻokahi kenekulia. Ma hope o ke kūkākūkā nui 'ana me ka po'e Hawai'i, ua 'ike leʻa 'ia ke kumu nui e pono ai ka Hale Hawai'i no ka hō'ike 'ana i ka hoʻomaopopo ʻana o ka po'e Hawai'i me ko lākou mau manaʻo a me ko lākou mau leo ponoʻī.
Ma o kēia mau mana'o ʻaelike i puka mai ai ka mana'o nui e pono ai ke hoʻoponopono hou 'ana i kēia mau papahele 'ekolu o ka Hale Hawai'i i kūkulu 'ia me nā wao e like me ke ao o ka po'e Hawai'i. Pehea lā ke 'ano o ka nānā 'ana i ka 'āina me nā māhele papa moe. No ka mea, no kēlā me kēia māhele papa moe o ka 'āina, 'oko'a nā 'ano mea kanu a me nā holoholona i ulu ma kēlā me kēia 'āina, 'oko'a pū ho'i ka hana o ka po'e o ia wā, a noho 'ia ka 'āina e nā akua 'oko'a kekahi.
I loko o ka Hale Hawai'i, ma ka papahele mua, hō'ike 'ia nā hana pili i ke Kai Ākea - ke kai moana - i holomoku 'ia e nā poe holomoku, ka ho'okumu 'ia 'ana o ka pae 'āina Hawai'i, a me ka hō'ea 'ana mai o nā akua a me ka lāhui kanaka.
Ma ka papahele 'elua, hō'ike 'ia ka hana o ka Wao Kanaka- ke ola o ka po'e lāhui kanaka a me kā lākou hana i loko o ko lākou ola. I kou māka'ika'i 'ana i ke kai ākea a pi'i i luna, 'ike 'ia nā pahu hō'ike'ike me nā pono lawai'a o ke kai hohonu, nā pono lawai'a o ke kai pāpa'u, nā pono hana mahi 'ai, a me nā pono no ka ho'omākaukau mea 'ai. 'O nā pahu hō'ike'ike a pau āu e kā'alo a'e ai, hō'ike 'ia nā 'ano pono hana like 'ole. Ma loko o kekahi mau pahu hō'ike'ike ma ka 'ao'ao o ka hūlili, hō'ike 'ia ka wā e kau ai ka mahina, ka wā kūpono e kanu ai i ka 'ai, ka wā kūpono e lawai'a ai i ka i'a, a i ke akua hea lā e pule ai.
Ma ka papahele ʻekolu, 'o ia nō ka papahele no ka Wao Lani, ʻo ia nō ke ao lani, he wahi kapu ia no nā mea pili i nā akua. Ma laila nō i hō'ike pū 'ia ai ke ao o nā ali'i, ka po'e ho'i no lākou kēia mau mea makamae e mālama 'ia nei i loko o ka Hale Hawai'i a pau pū me nā pono o nā aliʻi o ke aupuni mō'ī Hawai'i. Ma ka mana'o Hawai'i, he mau mea makamae nō ia ma muli o ke kūlana kiʻekiʻe o ka po'e ali'i. Ma laila nō kākou e 'ike ai i ke 'ano o ko ka ʻuhane a me ko ke kino o ua mau mea makamae ala i mālama 'ia i loko o ka hale hō'ike'ike.